नेपाली काँग्रेसका केन्द्रीय सदस्य प्रदीप गिरिको भारतको मुम्बईमा उपचार भइरहेको छ । घाँटीमा समस्या देखिएपछि केही दिनअघि मुम्बईस्थित हिन्दुजा अस्पताल भर्ना गरिएको उहाँको परिवारिक स्रोतले जानकारी दिएको छ ।
घाँटीमा एक्कासि समस्या देखिएपछि नेता गिरि उपचारका लागि मुम्बई जानुभएको हो । उहाँको स्वास्थ्य अवस्थाबारे जानकारी लिन कांग्रेस उपसभापति विमलेन्द्र निधि आज मुम्बई जानुभएको उहाँका प्रेस सल्लाहकार रामजी दाहालले जानकारी दिनुभयो ।
उपचारका लागि मुम्बई जानुअघि उपसभापति निधि र नेता गिरिबीच उपचारबारे सल्लाह भएको उहाँले बताउनुभयो । उपसभापति निधि काठमाडौँबाट जनकपुर हुँदै मुम्बई जानुभएको हो । “शुक्रबार निधिले गिरिलाई भेटेपछि उहाँको स्वास्थ्य अवस्थाबारे थप जानकारी प्राप्त हुनेछ”, दाहालले भन्नुभयो ।