【自由副刊．台

【自由副刊．台語日常】 劉靜娟／無愛予伊知影我咧想啥 － 外二章
2021/07/16 05:30
圖◎吳怡欣
◎劉靜娟 圖◎吳怡欣
上網路搜揣（搜尋）烘碗機，猶未決定欲買啥牌啥款，想講無定著去附近電器行看現品。紲落（接著），我去看面冊。想袂到，面頂隨有我拄才看的烘碗機的廣告矣！
我略略仔了解網路的商業機制，但是，訊息的傳播遮爾緊（快），像以前阮媽媽愛講的「跤（腳）接跤」（不旋踵），一點仔縫都無，猶是予我驚一趒（嚇一跳）。
請繼續往下閱讀...
然後，我揣（tshuē，找）一齣電影的評論，連去一个blog，佇遐，烘碗機的廣告足足有半頁！
因為網路大數據的演算法，你的興趣、你踏跤到的所在，伊攏掌握；所以會當即時「飼」相關產品的資料予你。敢若內底覕（bih，藏）一个情報人員――經過戒嚴時代的人會講覕一个「警備總部」；你看的、揣的若是關係政治，彼款感覺應當閣較明顯。
一年前，我開始興看連續劇的時，朋友講我竟然連明星上新的消息都知；我講毋是我主動去關心，逐日手機仔拍開，攏會看著in（他們）的新聞啊。朋友講你揣過抑是點過彼款新聞，人才會綴（tuè，跟）你綴牢牢。
著，我點過的演員，日後伊的動態就不時出現。有時閣真周到，講『猜你會喜歡』，予你進階的消息。
可見，我予人箍佇一个敢若「牢」的範圍內底矣，佇遮，人供應我啥飼料，我就食啥；愈食愈慣勢。賣毒品的人可能就是按呢一步一步唌（siânn，引誘）少年人。
頂日，佇一个看影劇的平台，閣看著一逝（tsuā，行）字，講因為我看過某一齣，所以予我選擇的劇有遮的性質差不多的。其實彼齣，我kan-na（只）看兩、三集就放棄，竟然就予人「點痣做記號」。我毋捌（不曾）去點的節目，閣會寫伊偌濟pha適合我！
講起來是平台體貼、服務周到，毋過，我愈想愈袂爽快。
我謹慎，也保守，袂去下載一寡有的無的程式，也袂佇面冊耍「變面」抑「你是啥款個性」等等齣頭；但是，我的興趣、我的行蹤等等個人資料猶是予人掌握咧啊。
我欲反抗，刁故意無愛去點網路提供的影劇和新聞。以前，後生讀高中的時，一遍我予老師請去「談話」；轉來，我共阮囝講：「老師無法度了解你，講毋知你咧想啥。」阮囝講：「我才無愛予伊知影我咧想啥！」
我也無愛予網路臆著我咧想啥；毋過，既然無法度脫離網路，欲走閃「大兄哥」的監視，敢有可能？
眼緣
講起某一位明星，阿明講：「伊無我的眼緣。」
「眼緣」，第一遍聽著這个辭。以前較捷（tsia̍p，常）聽序大人講的是，「某乜人無我的緣」。
眼緣kan-na（只）講外表，「無我的緣」主要應當是講個性。
按呢講較忠厚，比直接批評／嫌人較好。毋是伊無好，是無我的緣；可能是我的偏見，也可能是我無眼光。
有時我講某一位明星的喙傷厚，某一位明星「天生歐巴桑面」……心內會想，「這種話予伊本人抑是in（她）媽媽聽著，心情一定真䆀（bái，差）。」in袂聽著我的話；毋過，這陣有面冊、有各種社群平台，負面的留言有真大的殺傷力。
仝一位明星，抑是名人，有人佮意，有人討厭。有時我大力推薦的劇抑是明星，人無愛，我會感覺失望、遺憾，拍拚欲改變別人的想法。
《淘氣阿丹》的主角足古錐，尪仔冊和電影攏真好看。故事內底，蹛（tuà，住）附近的威爾森先生不時予阿丹創治（捉弄），雖然毋是故意的，伊講著阿丹，猶是氣怫怫；偏偏威爾森太太足疼阿丹，歡迎伊來。威爾森太太對in翁講：「袂當和你分享我的快樂，真悲傷。」
朋友袂當分享／贊成我的看法，我就有彼種感觸。
不過，聽著「眼緣」、斟酌思考這个詞了後，我想：毋是我的眼光無好，毋是我推薦的劇差，朋友只是對伊無眼緣。朋友推薦的冊抑是電影，我嘛無一定佮意啊。
按呢講起來，緣真重要，莫怪新娘入門的時，媒人會撒緣（鉛）粉，講好話；鉛緣台語仝音。我捌看著有人共一包鉛粉囥（khǹg，放）佇門頂頭的氣窗；新娘出出入入，應該攏會受著鉛粉的祝福。
矸仔內的毛筆
我的桌頂有一个透明的玻璃矸仔，細細仔，六公分懸（高），我用來插歇睏的毛筆。
罕得寫字、畫圖，初一十五才會用著毛筆（意思是敢若拜拜，看日仔的）。用過，嫌洗筆費氣，我就共伊插入去矸仔內。矸仔底有一、兩公分的水，筆斜斜囥（khǹg，放）咧，拄好予筆毛浸佇水內，保持澹澹（tâm，濕）的狀況；筆管無浸著水，袂傷著內底的膠。
當初學寫字的時，攏照老師教的，毛筆佇水道跤慢慢仔轉，勻勻仔洗；洗清氣矣，用紙抑是布小吸吸咧，才吊起來，予筆毛焦閣鬆。老師講按呢，毛筆的壽命才會較長。
這陣變老油條，無想欲繼續用毛筆的時，就共伊插入矸仔內；「時機」到，才請出來用，連「潤筆」都省起來。
好佳哉，我的毛筆真耐命，兩個月、三個月徛（站）佇水內，也無落毛。毋過，共伊插入矸仔彼个無啥幼秀的動作，會予我想著以前剃頭師仔……
阿梅聽我講到遮（tsia，這兒），隨笑出來，講以前剃頭徒弟用冬瓜來練習剃頭，有代誌離開的時，就共刀仔插落去。
著。我聽過的故事是，古早的人學剃頭工夫，愛食三年的苦。初初入門時，是做雜差仔；洗衫，掃塗跤，抱囡仔，攏愛做。當咧練習剃頭的時，聽著頭家娘叫伊去買豆油，買鹽，就紲手（suà-tshiú，順手）共剃頭刀仔插入西瓜。後來出師，剃真正的人頭，聽著頭家娘叫，煞（suah，竟然）共剃刀插入去！
「這款笑話，這陣的少年一定毋捌（不曾）聽過；聽著也無法度了解。」阿梅講。
著。講笑話著愛選適當的對象，才會共鳴。
不過，我毋是攏共毛筆想甲遐爾恐怖、殺氣；看伊靠佇矸仔邊、徛佇水內，斜斜的姿勢真文雅優閒，有時兩支倚做伙，敢若真親密，我會想著《詩經》的「遡游從之，宛在水中央」。●
已經加好友了，謝謝
歡迎加入【自由娛樂】
按個讚　心情好
已經按讚了，謝謝。
今日 TOP 10

Related Keywords

Taiwan , Iraq , Taiwanese , Yee Yan Juan , Han Nguyen , Peter Han Young , Junior , High School , Branch Reliance Do , Ita Stepa Step , Han Nguyenii Iraq , Iraqi Her , Viagra Nelson , First , Branch Reliance , The Book , டைவாந் , இராக் , டைவநீஸ் , ஹான் ஂக்யந் , ஜூனியர் , உயர் பள்ளி , முதல் , தி நூல் ,